-[ يُــمّــه ]- ,,,,,,,,,,,,,,

عطرالخيال · #1 (**permalink**) 14-08-2008, 02:39 PM

بسم الله الرحمن الرحيم ..

.

.

.

فقدت قبل قبل فتره أغلى إنسانه على الوجود وكنت أحاول نظم شيء يليق بها ولكن للإسف وجدتها أكبر من كل الأشعار والأقوال ..
وكنت لا أستطيع إكمال أي محاوله تعبر عن إحساسي بسبب فقدها ..
وهذه النص والله أقل ما أقدمها لها رحمها الله رحمةَ واسعه ..

.

.

.

يمّـه تواريتـي ولا بعـدك أونـاس

بعدك زماني صار حوسـه بحوسـه

همٍ .. وغم .. وكسر خاطر وهوجاس

والعين معبد .. والدمع من طقوسـه

الصدر ضايـق والمعاليـق يبّـاس

والحال عظم وجلـد والهـم سوسـه

تجبرني الذكرى ويكسرنـي اليـاس

وأنهرت بين طعون وقتـي وموسـه

تعبت أعزي النفس وأقول لا بـأس

ظلمـاي بعـدك ماتنيـره شموسـه

بين البشر عايش ولاني مع النـاس

النفـس عيـت لا توالـف نفوسـه

أجلس مع الجلاس والفكـر منحـاس

شارد ذهن كـل المسافـات أقوسـه

بعد السعـاده صـرت للهم نبـراس

وقصر الفرح ينهار من ضرب فوسه

ياكثر ماطقيـت فـي كفـي الـراس

وياكثر ماعضـن بهامـي ضروسـه

وياكثر في طاريك ماحبس الأنفـاس

خوف الدمع يشرح على الخد بوسـه

وأشم ريحك كـل ماهـب نسنـاس

لا صار من يمـة مكانـك عسوسـه

لـو الغـلا ينقـاس يمّـه بمقيـاس

حُبك بقلبـي صعـب محـدٍ يقوسـه

أنتي ذهب قلبي .. غناتي والألمـاس

أنتي بنات الفكر .. وأنتـي دروسـه

أدعي لعل إللي تَخَضَّـعْ لـه النـاس

يجبر عـزا نفـسٍ زمانـه يدوسـه

يالله عسى لك بين الأكرام مجـلاس

بالخلد يمـه بيـن يانـع غروسـه

م ن