هااااااا آخذ المــــــــااااااااايك ...!
يــــــــــلاااا بآخذهـ
احـــــــــــم احــم << يا زين صوتي بالماااااااايك 
مرحباااااا جميعاااا .. كيف حالكم .. علومكم .. إلخ << ما عندها وقت :)
اشركم لاختياااري للمايك احرجتم تواضعي والله ..
أبدى بيومياتي << كااان الله في عونكم .. 
أمس بليل في تمام الساعه 8 اقترح أبوي نروووح البحر لأني خلصت اختبارات << بتحررركم ..
وكانت هالرحلة مقتصره علي أنا وأمي وأختي الصغيروونه أو بمسمى آخر القعده لأن الباقي للحين يعانون من الإختبارات .. وروحي يا بسووومه وألبسي وطيراااان ع السياااره..
وصلنا البحر والناس فارشين وجالسين قدااام البحر ..
بس طلع طلع طلع البحر 
جزر لاااااااااااااااااااااااا << من عيووووونكم قعدنا بعد شنسوي المهم قلت لأبوي : عن اذنك بروح اتمشى وادخل البحر لين اوصل للماي هنااااك ..
قال : أذنك و خشمك معاااك بس لا تطولييين واذا اشرت لك تعااالي لأن بنمشي ..
قلت : في اختراع اسمه جوال دق علي لا تتعب ايدك بالتلويح << حلوه ذي تلويح قال : طسي وماني دااق بأشر وأنادي باسمك بعد ..
قلت : على راحتك طال عمرك << اخس يالمؤدبه 
مشيت ومشيت ومشيت << بتعلمكم إنها بعدت
والبحر بعيد حيييل يوم شفت بعده هونت ما عاد أبيه يقعد أنا إلي يبيني يجيني وأنا راده شفت مرأه عجووووز قاعده على صخره وهي بعيد عن الشاطئ وبروحها .. قعدت اراقبها وهي المسكينه يالله تقوم و يالله تمشي وبعدها ترد وتقعد على الصخرة وشكلها تنطر وتدور أحد ..
رحمتها كسرت خاطري و رحت لها سلمت عليها ..
قلت : خير يا خاله شمقعدك هنا بروحك ؟؟
قالت : والله يا بنيتي ولدي جابني لهنا وقال لي اجلسي وبروح شوي وأجيك .. وتأخر علي ولا جا ..؟!!!
<< أنا على طووول قلت بنفسي واااااااا خزياااااااااااه لا يكوون هذا من إلي يجيبون امهاتهم و أبوانهم لأماكن عامه ويتركونهم ولا يردون ويخلون الناس تاخذهم لدار العجزه تبا لهم << تكفين يالفصحى المهم ما حبيت أقول لها شي..خايفه على مشاعرها شلووون ولدها يسوي هالشي ..!!!
قعدت معاها أسألها عن ولدها بعرف هو صدق إلي أحسه أو لأ ..؟؟
قلت : خاله ولدك متزوج ..؟
قالت : إي ولدي توه متخرج << هههه الخالة سمعها ضعيف !
قلت : ما شاء الله طيب هو متزوج << بصوت عالي
قالت : لا والله ما هو متزوج ..
( قلت بنفسي غريبه ما هو متزوج يعني ما عنده مرأه عقربه مثلا تحن عليه عشان يخلي امه ليييييه تركها أجل )
كملت التحقيق قلت : خاله انتي ساكنه بالبيت ويا ولدك بروحكم ؟؟
قالت : لا والله الجو ما هو حروره بالعكس براد الحمدلله << ههه نفس المشكلة
ضحكت لها قلت : لا خالة قاعده أقول إنت و ولدك ساكنين البيت بروحكم ..؟
قالت : إي والله بناتي الكبار متزوجات وما عندي غير هالولد من عقب موت أبوه الله يرحمه ..
( قلت بنفسي << عاد افهموها إذا فتحت قوس معناه هالكلام بيني وبين نفسي .. قلت يا جعلك ما تتهنى بحياتك ما عندك إلا هالأم و راميها ورايح وغيرك يتامى يتمنون أم .. لا وبعد المسكينه طيبه وعلى نياتها .. يا جعله ويا جعله ويا جعله ودعيت عليه لي طاب خاطري 
) قلت : خاله شرايك تجين معي نرد للشاطئ تقعدين مع أمي والله راح تستانس فيك << بصوت عااالي
قالت تستانسون بالعافيه يا رب لا يا بنيتي أخاف ولدي يجي ما يلقاني ..
( يوم قالت هالكلام تقطع قلبي عليها يا ذا الحنيه إلي فيها و هو ولا داري عنها .. وقررت أدق على أبوي وأقوله السالفه وإني بآخذها معانا للبيت ونفضي لها غرفه ولا يمكن أخليها تروح دار العجزه )
قلت:خاله عن اذنك بكلم أبوي << بصوت صراااخي
قالت : كلميه يا أمي على راحتك ..
بعدت عنها شوي ودقيت !
أنا : ألووووووو
أبوي : هلاااا
أنا : هلا فيك شلونك
أبوي : بخير .. ما كنك عندي قبل شوي !!
أنا : نسأل يمكن استجد شي !
أبوي : فاضيه ومعبيه رصيدك تعالي عندي وسولفي أمك خلصت علومها ..
أنا : لا بس بقولك سالفه ( وقلت السالفه من طق طق لي السلام عليكم )
أبوي : أنا أخوووو أختي << ما راح أقول اسم عمتي ما طلبتي يا بنيتي والله آخذها وأحطها بعيوووني ..
( أمي كانت جالسه جنبه ولما سمعته يقول والله آخذها وأحطها بعيوني أنجنت وعصبت وشياطين الأرض كلها ركبتها وسبت فيني لي قالت بس << تحسبه بيتزوج عليها وأنا إلي جايبه العروس )
المهم سكرت وأنا مرتاحه شوي ورديت لها ..
قلت : خاله ما كأن ولدك تأخر والله تمشين معاي ما راح أتركك بروحك ..
قالت : لا والله ما أمشي هو قال بيجي بس دقايق ويجي ..
ما دريت إلا بواحد واقف فوق روسنا رفعت راااسي إلا رجال تعطيه عمره 25 .. تخرعت وقمت من مكاني وسحبت الخاله معاي وهي تقولي اصبري اصبري يا بنيتي هذا ولدي << طاااااااااااااااح وجهي من يجمعه 
وهو المسكين تروع عباله بخطف امه ما يدري شسالفه ؟؟
قالت أمه : وينك طولت قال: رحت اشتري لك مااي ولقيت صاحبي وأخذتنا السوالف وأنا ما حبيت أحرجه واتركه << طااااااااح وجهي مرة ثانية هل من مجمع له يا محسنين راس مالي هالوجه 
وأنا إلي ما خليت دعوة ولا سبه إلا قلتها فيه وهو رايح يجيب لها ماي! يا ذا المخ السنمائي كله من هالمسلسلات إلي نشوفها عشت الدور !
قالت : يا ولدي هاذي البنيه والله انها سلتني وأنا قاعده بروحي وما تركتني وغمزت له وقالت : لا وبعد ما غير تسأل عنك << حتى العجايز 
( لا لا لا تكفييييييييييين أنا أسأل من حسن نيه بعرف ولدك العاق ليه رماك وهي تقول أسأل عنه يا ذا المصيييييبه )
أنواع الإحراج ما عرفت أتكلم قلت بصوت متقطع : مـــ ــع الــ ـسلامـــ ــ ـه .. وما تشوفون إلا غبرتي وراي ..
قالت : لحظه تعالي يا بنيتي حتى أسمك ما عرفته ..
قلت وأنا ماشيه : وقــ ـت ثـ ـ ـاني إن شـــ ـ ـاء الله..
وصلت لأمي وأبوي وقلت لهم السالفه ماااااااااااتو ضحك وأنا متقطعه من الفشله ..
شوي إلا العجوز نفسها تسلم وأبوي قام وتركنا سولفت على أمي وأمي قالت لها السالفه ومسكتني تضمني تقول يا عمري عمرك أثر هذا فكرك ما قصرتي وبتسكنيني عندكم بعد !
وأنا طرمه مستحيه ..
ردينا البيت محد بعايلتها الكريمه ما عرف بالسالفه وسموني سفيرة النوايا الحسنه و إلا مراات ينادوني اليونيسكو ..
مووووقف ما أنسااااااااااه .. << احسن من اللقافه الزايده بااااااااااااااايووووووو :)
الإهداءات
« آخـــر الـــمـــشـــاركــــات »
05-06-2008, 10:24 AM
